Sab fase hain kahin na kahin, sabko aage badna hai

Thodi dhakka mukki toh hogi hi, sabke jane ka rasta nahi

Kahan jaa rahe hain shayad kisi ko nahi pata

Pata karne me lagta hai samay, joh kisi pe hai nahi

Peeche nahi choot sakte, jab sab jaa rahe hain toh sahi hi hoga

Aur maksad paake kisne kya kar liya, bhool toh log unhe bhi gaye

Kuch tasveero aur kitabo me ane ke liye kya ye keemat sahi hai?

Aaj dunia aisi hai, kal shayad alag hogi, jaise parso ko dekhke lagta hai

Jis samaj, bhagwan, haq, vichaar vagerah  ke liye lad rahe hain hum

woh toh bane hi abhi hain kuch saalo pehle

Shayad kuch saalo baad naye ban jayenge

Toh fir karna kya hai, jana kahan hai, banana kya hai, sochna kya hai

Ye sab baatein toh bemani hain 

Shayad jaise duniya chal rahi hai, uske saath ladte jhagadte,

kabhi khush hote, kabhi rote, aage badte rehne me hi saar hai

Bas shayad achha lagne liye thoda tez chal sakte hain,

shayad isi bahane sharir swasth rahe

thoda gunguna sakte hain, manoranjan hota rahega

raste me thodi baaten kar sakte hain, fir aage saathi mile na mile

ab bas isi se tasalli kar sakte hain..