Ye khat hai un pariyo ke liye jinko maine dil se chaha

Maine tumko pari kaha kyonki mai jis school me pada hun wahan ladkiyan nahi hoti thi aur har ladki ek pari tarah lagti thi. Kabhi tabiyat se tumhe dekh nahi paya..ya yun kaho himmat nahi hui..saal guzarte gaye lekin mai baccha hi reh gaya.

Ho sakta hai tumhe mai kuch zayada ya kam keh gaya hunga.. Kitna bolna hai ye mujhe kisi ne kabhi sikhlaya nahi. Aur kai saalo tak koi bolne ke liye tha bhi nahi. Lekin sach kehta hun ki kabhi tumhare liye maine galat nahi socha..tumhe sabse jayda izzat di.. aur tumhari har khwahish ko poora karne me jut gaya..shayad tabhi tumhe laga ki mai tumhare kabil nahi

Thodi narazgi mujhe tumse hai aur thodi khud se bhi. Itna karne ke baad bhi kyon tumne mujhe kabhi yaad nahi kiya..shayad tumhare liye sabhi itna karte hain.. Par kya sacha me tumhe unme aur mujhme farq nahi dikha. Aur khud se isliye naraz hun ki maine itna kyon kiya tumhare liye..tumne kuch karne ko kaha toh tha nahi.

Narazgi bhi badi ajeeb cheez hai..kayde se toh mujhe tumko bhool jana chaiye..lekin ye narazgi hi saali bhoolne nahi deti. Aur sach bataun toh bool jane ka mera mann bhi nahi.

Joh kuch bhi thodi bahut yaaden hai..kuch toh hai mere paas joh purana hai aur joh achha tha. Kadwa hi sahi aakhri niwala, baaki swad toh sachha tha.

Ab kehne sunne ka koi fayda nahi pata hai mujhe.. Dil ki tassali ke liye tumhare naam se khud ko ki khat bhej raha hun mai.. Khud hi likhkar khud hi pad lunga ise.. shayad kabhi dhoke se tumhe meri yaad ajaye…