Mai gaanv me kabhi raha nahi par sochta hun ki gaanv kaisa hota hoga
Bade bade neem ke ped aur khali maidan
Zhoolo pe zhoolte , puarne tyre se khelte bachhe
Talaab ke kinare lambi saans bharte log
Jab bhi kabhi gaanv gaya hun dekha hai ki log bade khush hain
Aanganwadi se aate jaate safed aur laal kapdo me bachhe
Har jati hui gaadi ko dekh ke muskura dete hain,
Hello karne pe sharma jate hain
Ye chote chote kadam jab nanhe kandho pe baste taange
apni masti me sadko par chalte dikhte hain,
toh lagta hai desh shayad pragati ki ore bad raha hai
Gaanv me sab jaldi uthte hain suna hai
Chaar baje se hi pani ki ghanghanahat sunai dene lagti hai
Jhaadu ki awaj, kahin door chalta radio aur purane gaane
Shehar me toh kabhi dekha nahi 4 baje kaisa lagta hai
Lekin mahsoos kar sakta hun kitna adbhud hota hoga suraj se pehle jagna
Gaanv ka khana shayad bahut sada lekin shuddh hota hoga
Sarso ka saag, makke ki roti banta toh seher me bhi hai
lekin gaanv me shayad jayda swad hota hoga
Doodh, dahi,ghee, anaaz, sabzian sab hi toh gaon me padia hota hai
Toh khana toh achha hona hi hai
Sochta hun kitni shaanti hoti hogi
peepal ke neeche baith kar, khali maidan dekhne me,
ya fir kheto ko ek sire se dosre sire tak naapne me
Door jab dikhta hai kisaan tracter chalata hue ya fasal katte hue
Toh lagta hai inki mehnat hi inko sabhi beemario se bachati hai
Aangan me tulsi ko paani dene me
Ya chabutre par baith ke padosio ke saath akhwaar padne me, kitna sukh hoga
Gaaon ki aurte bhale hi rehti toh ghoongat ki aad me hain,
lekin ghar ko swarg banana me utni hi mehnat karti hongi jitna seher ki ladkiyan daftar me
Asaan nahi hota hoga, kuyen se paani bharna, janwaro ko chara dena,
zameen ko gobar se leepna, khud se papad belna, chat pe masala sukhana, aur bhi 25 kaam
Usme hi unka sansaar hai, aur who shayad khush hain
Bas ek aspataal aur hota gaanv me toh shayad koi kami na thi
Aathvi tak ki padhai toh lag bhag har gaaon me hai
Kabhi kabhi un skoolo me sarkari karyakram bhi hote rehte hain
Baarvi tak ki padai bhi bagal ke gaaon me ho hi jaati hai
Baaki jabse ambani ji ne jio diya hai, whatsapp university pe sab pata chal jata hai
Aur usse jayda jisko padna hai who waise bhi seher jata hai
Jab bhi sochta hun gaon ke baare me, ye khayal bhi ata hai
Kya gaaon ke log bhi sehro ke baare me aise hi sapne bunte honge
Sehro ki suvidhao ko, gaaon ke sukh se, kya tolte honge?
Shayad unke liye sukh ke mayne alag hote hon
Gaaon ki bhi apni kamiyan hai
Shayad tabhi itne log seher palayan karte hain..